Mat 24 | GAM | STEP | Jisas lotu numb kerman kere er orko puno dje pika, kogoye una wo lotu numb kerman wopake taki mal, Jisas moi al ombine dje awi.

Matthew 24

Lotu numb kerman to ke yene

(Mak 13.1-2 ne, Luk 21.5-6)

1 Jisas lotu numb kerman kere er orko puno dje pika, kogoye una wo lotu numb kerman wopake taki mal, Jisas moi al ombine dje awi. 2 Jisas embe dji, numb ge ye kaninj mo? Na kandja kaima dje ye aundo, are una wo sellko kal worneke, ku taimanta pla nayenda, to gur dje kal makimb al woro kerne we dji. 3 Jisas dumo mekbe Olip yei al po ami dje moika, kogoye una womaka yenekne moi. Molmaka, kogoye una embe dji, ni djimbena no pupon. Ni kandja djinden ge kune nam yenda? Wal naral wal asamoll pandaka, no kanbona are ni er yem wombenka, kupill makimb pora djinda ne? dji. 4 Djimaka Jisas embe dji, una wo ye kandja kende dje djine, ye kanpol tane. 5 Una merke na kandjina al wo embe djine, God Krais dje worda wo yene unakiye i yem worda we dji ge na wale wondo we djine. Kambono wo kandja kende dje auneke una pille kaima piye. 6 Kunda kerman paro we djineke, ye piyeke kunda kerman kaima yenj we djine ge, ye pille aya dje kand nagoye. Una kunda kaima boye ba, kupill makimb pora djinda ege manda nayenda. 7 Una iwa duliye ta ye molo, ta tondaka kunda boye. Una dumo kerman ta i yem djineke, gaman dumo djell ta moye ge i yem djineke kunda boye. Dumo merke kam imem kerman wondaka, kam koll kerman ke yendaka, kwa napanda. 8 Wal ke embe wonda ge er welke wonda. Ana womba kuyo dje yendaka gakle ngembill kindja goro mal embe panda. Are wo kerman ke punda.

9 Una wo ye i kunda yem una aglene al worneke, ga ye ye ke ye awo, to goye. Una porapora dumo yemyem moye al, ye na wombana mor pille kane ke kanne. 10 Kune ge una pillgi djine ge alla kerne. Una ta ye molo ta kane ke kandaka, ta ye molo ta kane ke kandaka, i kunda yem una aglene al worne. 11 Una propet kende merke wo kandja kende djineke, una pille kaima we dje piye. 12 Una singare ke yene mal ge wor kerman punda. Ge pille, una merke una boll kane wopake kaninj mal ge alla kerne. Una kane wopake ye naune. 13 Ba alla una agle gi dje moyeke, ege pora djinda kune ge, God i yem worda. 14 Asamoll una dumo porapora yero al po, una kuruwo kama porapora moye al, God dumoye kandja wopake paro ge dje una auneke piye. Are kupill makimb pora djinda.

Wal urup are wonda

(Mak 13.14-23 ne, Luk 21.20-24)

15 Asa iwa Daniel Baibel al bolo pagi mal ge, una wal ketawa kaima ta ipo lotu numb kerman numog woro pagiye we dji. (ni pepa kerden ge ni pille kane gi dje mopen.) 16 Iwo pagi dal, una distrik Judia moye ge, seke er makimb mekbe al pine. 17 Una ta numb beto moya ge, alla er kal wo wal numog yenda ge nainda; kiwa er kal wo seke punda. 18 Una ta mauye al wane moya ge, er yem wo koniye kunomiye nainda; kiwa seke er punda! 19 Ana womba moglo moye ge ne, womba kindja am awo moye ge wandill mal moye. 20 Ye seke pine ge ye kamang yene, kam ke tago, nu kam to djinda dje kamang yene. 21 Una imb kakne ge imb kerawa kaima kakne. Asa God wal porapora beki ye pa woi ipon yero ge imb embe mal una nakaki. Alla are imb embe mal nakakne. 22 God ege ge i tuge nawori dal, una kurwo kama porapora goye. Ba God yene dje i una golo djine dje pille, une ege ge i tuge worda we dji.

23 Una embe djine, God Krais dje worda wonda we dji ge une woi ba moro! we djine. Una pende embe djine, une kolagala moro we djine, ba ye napiye. 24 Una kandja kende embe djine ge kaima wo djine. Ta wo embe djinda, God Krais dje wori woi na wale wondo we djinda. Ta, na propet woll moro we djinda. Kambono kogo dongall ke ye, djep kayekaye yene. Una nomane ye ke ye aumbon dje yene. Ga kende dje molo God dje i una i pakna worbon dje yene ba yene kune nayenda. 25 Ye pillme! Una kaima wo embe yene ba, na ye dje awill pora dji.

26 Una wo embe djine, une ge woi dumo wapra yei al moro, ye wo kanme! djine. Ba ye po nakanme! Une woi numb al numog moro we djine ge, ye napillme! 27 Kam kunakna poll djindo mal ge, Una Wombe are embe mal wonda. 28 Wal ta golo panda al ge kekdim wo makai tane we dji.

Una Wombe yem wonda

(Mak 13.24-27 ne, Luk 21.25-28)

29 Una imb kake moye ege ge pora djindaka, ola dje olpa emill yendaka, takene do au djindo ge pora djindaka, kam kandjip kupill al moro ge yage kal tondaka, kupill al wal dongall moi wal ge olup olup yene. 30 Are djep ta yenda, Una Wombe ge kupill al moya. Una kurwo kama porapora makimb al mor ge kane, kimb kallgane yene. Una Wombe yembe dongall pandaka, kam kupa boll aike wondaka, talang yendo ge una kanne. 31 Yene tau agelo kambono dje wordaka wo biugel to, yene dje i una dumo makimb porapora yero al moye ge tau agelo po dje i une moya al worneke moye we dji.

Iko pik kandja buko dji

(Mak 13.28-31 ne, Luk 21.29-33)

32 Iko pik yeke tondo mal ye kaninj! Asamoll ole gun wordaka are yeke mun yendaka ge ye kane embe djinj, ge aka donda pille yendo we djinj. 33 Yendo mal embe ge na kandja ipon dje aundo mal ye kani dal, ye embe dje kanne, Una Wombe yem wonda manda kaima yero. Une kond dua al agle moro dje kanne we dji. 34 Na kandja kaima dje ye aundo, wal merke wonda we djindo ge, una mor ge nagoye, gun mor mal embe molo kanne. 35 Kupill makimb pora djinda ba, na kandja djindo mal ge pora nadjinda, pa moya we dji.

Jisas wonda ege ge una nakaninj

(Mak 13.32-37 ne, Luk 17.26-30 ne, 17.34-36)

36 Jisas embe dji, ege ta yenda we djindo ge una porapora nakaninj. Tau agelo kupill al mor ge nakaninj, God wariye nakando, Nane taimane kando. 37 Iwa Noa moi kune una singare ye moi mal, Una Wombe wonda kune ge una singare embe mal ye moye. 38 Asa yei ge una kwa mokna no, ana i, abone ipo iwa awo, embe ye molo pumaka, Noa sip al er numog pika nu toi. 39 Una pillpol nato molmaka, kam kerman toika, nu wo una porapora to goi. Una pillpol nato moi mal, Una Wombe yem wonda kune ge una embe ye moye. 40 Una soka maune al kogo ye mopellka, ta i er punda, ta kerda. 41 Ana soka bret gapoll dje palawa kogo ye mopellka, ta i er punda, ta kerda. 42 Ye kanpol to moye! Ye Iwa Kerman wonda kune ge ye nakaninj. 43 Ye pillme! Kunumb una wonda ege, numb ne ta pi dal, une numb kantau wopake moya. Man panda, kunumb una wo une numbiye brukim yenda. 44 Ge pille, ye pillpol to moye. Ye napille moye poke, Una Wombe yem wonda we dji.

Boi iwa soka ge ta wopake yeika, ta ke yeika yepill mal Jisas kandja buko dji

(Luk 12.42-46)

45 Boi iwa ne mal molo, kandja piyaka, nomane wopake panda? Une ge embe mal moya. Iwa Kerman une moya al wo embe djinda, na boina iwa ana mor ge ni kantau wopake ye, kwa mokna gale kune ye awo embe ye mole! djinda. Une kandja embe dje kere er punda. Une er yem wo kanda boiye ge kandja dji mal kaima yei dal, boiye ge wopake moya. 47 Na kandja kaima dje ye aundo, iwa kerman ge ye wordaka yene wal porapora yero ge boiye ge kantau yenda. 48 Ba alla, boiye ge nomane ke pandaka, na iwa kerman kanan wando dje pille, 49 boi una moye al ge une po to, una boll kwa ne nu no dall yei dal, 50 boiye iwa kerman nawonda dje pille moya poke ge wonda. 51 Wo une to derpall ye wordaka, una djillakne soka paro una mor al po moyaka, una kasmane koglo, kimb kallgane yene we dji.